प्रसाद कुलकर्णी - शुभेच्छांचा सौदागर

ती मौनाने बोलत जाते

2011-12-14T08:56:00.000-08:00

ती मौनाने बोलत जाते
मी प्राणांनी ऐकत जातो
ती गालावर गोंदत जाते
मी ओठांनी वाचत जातो!

ती सुंदर ती लोभसवाणी
आनंदाची गाते गाणी
ती नाजुकसे फूल जुईचे
तिच्या मनाला पंख सायीचे
ती श्वासांवर तोलत जाते
मी श्वासांनी झेलत जातो
ती गालावर गोंदत जाते
मी ओठांनी वाचत जातो!

ती चाफ्यापरी मुसमुसलेली
ती केतकीपरी रसरसलेली
ती दरवळते जुई जाईतुन
ती रिमझिमते श्रावण होऊन
ती टपटपते प्राजक्तातुन
मी नजरेने वेचत जातो
ती गालावर गोंदत जाते
मी ओठांनी वाचत जातो!

-प्रसाद कुलकर्णी

.

'मन मोहरले' ध्वनिमुद्रिकेचे प्रकाशन

2011-12-08T05:43:00.001-08:00

‎'मन मोहरले' हा माझा १६ वा म्युझिक अल्बम (आणि पहिला सोलो) मंगळवार दिनांक २२/११/ २०११ या दिवशी संगीतकार राहुल रानडे, सिनेदिग्दर्शक राजू पार्सेकर आणि आमदार अशोकभाऊ जाधव यांच्या उपस्थितीत प्रकाशित झाला.
जेष्ठ संगीतकार सय्यद अली यांनी माझ्या शब्दांना स्वरसाज चढवला असून इंडियन आयडॉल अभिजीत सावंत, अभिलाषा चेल्लम आणि मंगेश बोरगावकर यांचा आवाज या गाण्यांना लाभला आहे. सिद्धेश सावंत आणि महेश खोपडे या दोन रसिक तरुणांच्या प्रयत्नातून ही सीडी साकार झाली आहे.

आणि एच.एम.व्ही. सारेगामा इंडिया प्रा.लि या नामांकीत संस्थेने या सीडीची निर्मिती केली आहे.

-प्रसाद कुलकर्णी

म्हाताऱ्या आईची गोष्ट

2011-05-23T07:30:00.000-07:00

मुंबई सकाळ मध्ये या वर्षीच्या १ जानेवारीपासून दर सोमवारी माझं 'गुड मॉर्निंग' हे सदर सुरु आहे.

सकाळ हे माझं होम पीच!. आणि त्यामुळे संपादकीय विभागातले माझे मित्र नेहमीच माझ्याकडून चांगलं चांगलं लिहून घेतात.

हे सदर खूप लोकप्रिय झालय आणि मला मेल्स वा फोनद्वारे त्याचा सतत फीडबॅक मिळत असतो.

क्रुतार्थ वाटावी अशी गोष्ट म्हणजे अलीकडेच मंगेश पाडगावकरांनी मला प्रत्यक्ष भेटीत सांगितलं की तुमचं सदर खूप चांगलं असतं आणि मी ते नियमित वाचतो. तुम्ही खूप छान लिहिता. यावर सुखद धक्का म्हणून की काय त्याच्या दुसऱ्याच दिवशी मला ज्यॆष्ठ पत्रकार कुमार केतकरांची मेल आली आणि त्यातही त्यांनी माझ्या लिखाणाचं मनापासून कौतुक केलं होतं. केतकरांसारख्या पत्रकारीतेतल्या भिष्माचार्यांनी स्व:ताहून अशी दाद देणं ही माझ्याकरता भारावून टाकणारी गोष्ट होती. त्यावर कडी म्हणून की काय, दोन दिवसांनी एका समारंभात ज्येष्ठ लेखक मधु मंगेश कर्णिक भेटले. त्यांनीही माझी पाठ थोपटत हीच भावना व्यक्त केली.

आता हे सारं मला माझ्या ब्लॉगवरल्या मित्रांशी शेअर करावसं वाटलं. विशेष करुन या सदरात मागील आठवड्यात मी लिहिलेली 'म्हाताऱ्या आईची गोष्ट'. या एका गोष्टीनेच मला खूप मोठ्ठं फॅन फॉलोईंग मिळवून दिलं. आणि माझ्या या भावना मी सकाळचे संपादक पद्मभूषण देशपांडे यांच्याशीही शेअर केल्या.

खरं खणजे ही गोष्ट नसून एक मुक्त कविता आहे. आणि ती वाचून तुमचा तुमच्या आईवडीलांकडे पहाण्याचा द्रुष्टीकोन बदलला तर ती मी माझ्या कवितेची परतफेड समजतो. क्रुपया तुमच्या भावना आणि प्रतिक्रिया मला माझ्या मेलवर कळवायला विसरु नका.

-प्रसाद कुलकर्णी

kulpras@yahoo.co.in - on behalf of Namrata

आनंदयात्रा ४२५ व्या प्रयोगाची क्षणचित्रे

2011-05-14T11:07:00.000-07:00

आनंदयात्राचा एक विशेष प्रयोग गुरुवार दिनांक २१ एप्रिल रोजी माटुंगा येथील यशवंत नाट्यमंदिरात संपन्न झाला. या सोहळ्याला आदरणीय पंडीत यशवंत देव, छायाचित्रकार गौतम राजाध्यक्ष, ज्येष्ठ अभिनेत्री आशालता वाबगावकर, ज्येष्ठ गोदी कामगार नेते आणि माजी महापौर शांती पटेल आणि मी मराठी वाहिनीचे पराग छापेकर उपस्थित होते. या शानदार सोहळ्याची ही क्षणचित्रे.

सर्व ज्येष्ठ आणि श्रेष्ठ मंडळींच्या हस्ते प्रसाद्चा सत्कार

आईच्या भूमिकेतून आशालताबाई आशीर्वाद देताना

देवांचा मूड असा मस्त लागला आणि गौतमजींची दिलखुलास दाद

देवांचा ही सत्कार

आणि हे "मेनी मूड्स"

रंगून गेलेले श्रोते आणि कार्यक्रमाच्या शेवटी प्रसाद सुखटणकर या वेड्या मित्राने भारावून जाऊन मारलेली मिठी आणि भारावून बघणारी त्याची आई -(नम्रता १४०५२०११)

सर्वांना अत्याग्रहाचे निमंत्रण

2011-04-09T11:49:00.000-07:00

प्रसादच्या आनंदयात्रा चा ४२५ वा प्रयोग गुरुवार दिनांक २१ एप्रिल रोजी संध्याकाळी ४.३० वाजता यशवंत नाट्यमंदिर, माटुंगा येथे आयोजीत करण्यात आलेला आहे. गेल्या काही वर्षात हा कार्यक्रम भन्नाट लोकप्रिय झाला असून अनेक नामवंतांनी, नेते, अभिनेते, पत्रकार, लेखक इथपासून गावागावातील सामान्य शेतकरी, मजूर, कामगार अशा सर्व थरातल्या लोकांनी या कार्यक्रमाला हजेरी लावलेली आहे. या ४२५ व्या कार्यक्रमाला ज्येष्ठ कामगार नेते श्री. शांती पटेल, संगीतकार पंडीत यशवंत देव, जागतिक किर्तीचे छायाचित्रकार गौतम राजाध्यक्ष, मुंबई महानगरपालिका सभाग्रुह नेते सुनिल प्रभू आणि मी मराठी वाहिनीचे पराग छापेकर हे प्रमुख पाहुणे म्हणून उपस्थित रहाणार आहेत. हा कार्यक्रम सर्वांसाठी खुला असून विनामूल्य प्रवेशिका कार्यक्रमाच्या दिवशी हॉलवर उपलब्ध आहेत. आगाऊ नोंदणीसाठी श्री अशोक वायकूळ यांच्याशी ९८६९३३७३०३ किंवा ९९६९०७७१३३ या नंबर वर संपर्क साधावा. सर्वांना अत्याग्रहाचे निमंत्रण! -नम्रता

आनंदयात्राचा अविस्मरणीय प्रयोग- मुक्काम अकोला

2011-01-21T01:36:00.000-08:00

हिंदी पेपर्सनी सुद्धा घेतली दखल..................नजर लागावी अशी गर्दी ही शुभेच्छांची एक्स्प्रेस........................................................आणि मंत्रमुग्ध श्रोते

्कवितांची रिमझिम आणि .......................................................रसिकांचा प्रतिसाद

आणि असा लागलेला सूर.... ४ जानेवारी २०११ रोजी प्रसादच्या आनंदयात्रा या महाराष्ट्रात आणि महाराष्ट्राबाहेरही लोकप्रिय ठरलेल्या एकपात्री कार्यक्रमाचा ४०० वा प्रयोग अकोला इथे आयोजीत करण्यात आला होता. ४ जानेवारी हा त्याचा वाढदिवस असूनही क्षितिज-विरंगुळा या अंध-अपंग-मतिमंद मुलांच्या संस्थेकरता निधी गोळा करुन देण्याच्या उद्देशाने त्याने हा कार्यक्रम विनामूल्य करायचं ठरवलं होतं.

३ जानेवारी रोजी मुंबईहून अकोल्याला घेऊन जाणारी हावडा मेल ८ तास लेट म्हणजे रात्री ८.३० ऐवजी दुसऱ्या दिवशी पहाटे ४.३० वाजता सुटली. ती सारी रात्र दादर रेल्वे स्टेशनवर कडाक्याच्या थंडीत घालवावी लागली. तिकीट चेकींग, बर्थ लावणे हे सारे सोपस्कार पूर्ण होईपर्यंत सकाळचे ६ वाजले होते. आता अंथरुणावर पडणार एवढ्यात वाढदिवसाच्या शुभेच्छा देणारा सेल वाजला. आणि त्यानंतर शुभेच्छांच्या फोन आणि एसेमेस ची रांगच लागली. एकदा त्याला वाटलं फोन बंद करुन टाकावा आणि झोपून जावं. मग त्याने विचार केला आपले मित्र, चाहते आपल्यावरच्या प्रेमापोटी आपल्याला फोन करतायत आणि आपण फोन बंद करायचा हे मुळीच बरोबर नाही. (दुसऱ्यांचा भावनांची आजवर तो नेहमीच कदर करत आलाय) आणि मग शुभेच्छांची ही आनंदयात्रा पुढचे बारा तास अकोला येईपर्यंत अशीच चालू राहिली. आदल्या २ रात्री रेकॉर्डींगकरता जागवलेल्या, ४ जानेवारीची रात्र दादर स्टेशनवर कडाक्याच्या थंडीत, अन १२ तासांचा मुंबई ते अकोला हा शुभेच्छांना प्रतिसाद देत केलेला प्रवास..... ४०० व्या कार्यक्रमाचे बारा वाजणार हे निश्चित झालं होतं. कारण दूरध्वनीवरून आधीच मिळालेल्या माहितीवरुन तिकीटं सारी विकली गेली होती, आणि प्रमिलाताई ओक सभाग्रुह आधीच हाऊसफुल्ल झालं होत.

पण संध्याकाळी ७ वाजता तो बोलायला उभा राहीला आणि पहिल्या पाच मिनिटांतच त्याने प्रेक्षकांना आपलसं केलं. पुढचे दोन तास सभाग्रुहात अखंड टाळ्या आणि हशा बरसत होता. दोन तासांनंतर तो अक्षरश: थकला तेव्हा त्याने कार्यक्रम नाईलाजाने थांबवला. अन्यथा रसिकाम्ची रात्री ११ वाजेपर्यंत थांबायचीही तयारी होती. या पोस्टवरती या कार्यक्रमाची काही छायाचित्रं आणि प्रेस रिपोर्टस टाकलेयत ते हा व्रुत्तांत अधोरेखीत करायला पुरेसे आहेत.

आणि हा कार्यक्रम सुरेख्ररित्या आयोजीत करण्याचं श्रेय जातं अकोल्याच्या सौ.मंजुश्री आणि उदय कुलकर्णी या दाम्पत्याला आणि त्यांच्या क्षितिज विरंगुळाच्या सर्व सहकाऱ्यांना..... आज या कार्यक्रमाला बरोब्बर १५ दिवस झाले तरी अकोल्याच्या रसिक प्रेक्षकाम्चे फोन्स किंवा मेल्स येतायत.

-नम्रता २१/०१/२०११

आनंदयात्राचे विनामूल्य प्रयोग, नाबाद ४०० च्या निमित्ताने

2010-12-31T06:00:00.000-08:00

'आनंदयात्रा' या माझ्या धमाल एकपात्री कार्यक्रमाचा ४०० वा प्रयोग ४ जानेवारी रोजी अकोला इथे क्षितिज विरंगुळा या अंध अपंग पुनर्वसन केंद्राच्या मदतीसाठी आयोजीत करण्यात आला आहे. गेल्या ५-६ वर्षांत या कार्यक्रमाने ह्जारो श्रोत्यांना आनंद दिला. अन मला श्रोत्यांचे प्रेम आणि कौतुक! सामान्य श्रोत्यांपासून सर्वश्री मधु मंगेश कर्णिक, मंगेश पाडगावकर, कुमार केतकर, स्टार टीव्हीचे राजीव खांडेकर, यशवंत देव, श्रीधर फडके, शिवसेना नेते सुभाष देसाई,नटवर्य श्रीकांत मोघे, मोहनदास सुखटणकर, संगीतकार मिलींद इंगळे, अवधुत गुप्ते, कौशल इनामदार अशा असंख्य सेलिब्रेटीजचे प्रेमही मला लाभले. (ही काही नावे वानगीदाखल. प्रत्यक्षात ही यादी खूप् मोठी आहे). केवळ महाराष्ट्रच नव्हे तर इंदौर, राजस्थान, बेंगलोर, दिल्ली, हैद्राबाद अशा परप्रांतातही आणि दुबई अबुधाबीसारख्या परदेशातही माझी ही आनंदयात्रा पोहोचली आणि श्रोत्यांना आनंद देऊन, मराठीची ओढ लाऊन आली. मराठीत शुभेच्छापत्रांची मुहुर्तमेढ रोवण्याचे उत्तरदायित्व परमेश्वराने माझ्यावर सोपवले आणि ते मी निभावले म्हणून की काय आनंदयात्रेच्या रुपाने लोकांना आनंद वाटण्याचे आनंददायी कामही पुन्हा त्याने मला दिले. नाबाद ४०० चा हा ट्प्पा आज गाठत असताना आयुष्याचे सार्थक झाल्यासारखे वाटते. आणि माझ्या या आनंदात सर्वांनाच सहभागी करुन घ्यावेसे वाटते. समाजाने मला दिलेल्या अलोट प्रेमाविषयी क्रुतद्न्यता म्हणून पुढचे ४ आठवडे गरजू संस्थांसाठी विनामूल्य प्रयोग करण्याचे मी ठरवले आहे. (अर्थात काही अटींवर).. -प्रसाद कुलकर्णी kulpras@yahoo.co.in

पहिला इंडियन आयडॉल, अभिजीत सावंत गातोय माझी गाणी

2010-09-01T23:41:00.000-07:00

नमस्कार.

्पहिला इंडियन आयडॉल, अभिजीत सावंतने आमच्या आगामी अल्बमकरता माझं गाणं गाण्याचा योग नुकताच आला. गॊड मुलगा आणि खूप मेहनती सुद्धा.

मी त्याचं वर्णन एका ओळीत करेन... milky boy with a silky voice. चार तास आम्ही न कंटाळता एका गाण्याचं रेकॉर्डींग करत होतो. आणि आम्हाला ’मॅनेज’ करत होते आमचे संगीतकार, श्री. सैयद अली.

आमचा हा म्युझिक अल्बम सुपरहीट होणार असा आम्हाला तिघांनाही विश्वास आहे. फक्त आणखी तीन महीने वाट पहा.

त्यात एकूण आठ गाणी असतील.

या टायटल सॉंगचे बोल आहेत -

लपवूनही लपवेना, अन धीरही धरवेना

हीच खरी प्रेमाची रीत असावी का?

प्रीत जिला म्हणती ती हीच असावी का?

-प्रसाद कुलकर्णी

छगन भुजबळ, महाराष्ट्राचे उपमुख्यमंत्री आणि मी

2010-08-08T03:42:00.000-07:00

महाराष्ट्राचे उपमुख्यमंत्री श्री छगन भुजबळ यांना भेटणं हा माझ्याकरता परवा एक चकीत करणारा अनुभव होता. या भेटीची मला संधी मिळाली ती माझे जवळचे मित्र असलेल्या प्रमोद आणि शैलेश या पेडणेकर बंधूंमुळे. आणि ही भेट झाली त्यांच्या मलबार हिलवरल्या ’रामटेक’ या निवासास्थानी. साधारणपणे कोणत्याही राजकीय व्यक्तीला भेटायला मी फारसा उत्सुक नसतो. पण माझ्यावर निरातिशय प्रेम करणार्या प्रमोद्ची ही दांडगी इच्छा होती.

त्यांना भेटायला महाराष्ट्राच्या कानाकोपर्यातून माणसे आली होती. आणि आम्ही निघेपर्यंत अखंडीत येतही होती. मला अप्रूप वाटावी अशी गोष्ट ही की या सार्या धबडग्यातूनही त्यांनी माझ्यासाठी वेळ काढला.

आजच्या तरुणांना (खरे म्हणजे प्रत्येक व्यक्तीला) सकारात्मक मनोव्रुत्तीची गरज आहे याबद्दल ते माझ्याशी सहमत होते. ज्यांना भुजबळसाहेबांचा संघर्षमय राजकीय प्रवास ठाऊक आहे ते माझ्याशी याबाबतीत सहमत होतील की ते स्वत:च सकारात्मक मनोव्रुत्तीचं एक चालतंबोलतं उदाहरण आहेत. माझ्या आनंदयात्राच्या मुंबईतील पुढल्या प्रयोगाला यायचं त्यांनी कबूल केलंय. मी त्यांना ४००व्या प्रयोगाच्या सोहळ्याला प्रमुख पाहुणे म्हणून बोलवायचं नक्की केलंय.

-प्रसाद कुलकर्णी

्स्टार माझा वरल्या पाऊस गप्पा

2010-07-22T07:37:00.000-07:00

स्टार माझा वर झालेला पाऊस गप्पांचा कार्यक्रम - शनिवार दिनांक १८ मे २०१०

सहभाग- प्रसाद कुलकर्णी, अरुण म्हात्रे, पद्मजा फेणाणी आणि मिलिंद भागवत

मंगेश पाडगावकर, अशोक नायगावकर आणि प्रसाद कुलकर्णी एकत्र

2010-06-21T06:03:00.000-07:00

मंगेश पाडगावकर, अशोक नायगावकर आणि प्रसाद कुलकर्णी यांनी एकत्र एकाच मंचावर तीन तास धमाल केली, सोलापूर येथे दिनांक १८ जून २०१० रोजी. हा कार्यक्रम यशस्वीरित्या आयोजीत केला होता, थर्ड बेल एंटरटेनमेंट या इव्हेंट मॅनेजमेंट संस्थेने. तीन पिढ्यांचे तीन कवी एकत्र आणण्याची कल्पना होती स्वप्नील रास्ते यांची. नाट्यग्रुह तुडुंब भरुन बाहेर क्लोज सर्कीट टिव्ही लावावे लागले तेव्हा ती अपेक्षेपेक्षा यशस्वी झाल्याची पावती मिळाली. हे फोटो आहेत कार्यक्रम संपल्यानंतरच्या क्रुतार्थ क्षणांचे. (ताजा कलम - वरील फोटोतले रिकामे ग्लास पाण्याचे आहेत याची नोंद घ्यावी.)

-नम्रता

आनंदयात्रेने ट्रिपल सेंच्युरी मारली तेव्हाची गोष्ट

2010-06-15T06:18:00.000-07:00

१४ नोव्हेंबर २००७- आनंदयात्रेचा ३०० वा प्रयोग मुंबईच्या रविंद्र नाट्यमंदिरात आयोजीत केला होता. प्रमुख पाहुणे होते, मधु मंगेश कर्णिक, लोकसत्ताचे संपादक कुमार केतकर आणि स्टार माझाचे राजीव खांडेकर. या प्रयोगाच्या पूर्वसंध्येला स्टार माझाने प्रसाद्ची जाहीर मुलाखत घेतली होती. १४ नोव्हेंबरचा प्रयोग जेवढा सुपरहिट झाला तेवढीच सुपरहिट होती ही मुलाखत देखील! सोबत आहे त्या मुलाखतीची संपादित चित्रफीत...

सुमन सुगंधाची सोनेरी पखरण

2010-05-28T11:17:00.000-07:00

्सारस्वत चैतन्य गौरव पुरस्कारांच्या निमित्ताने सुमनताईंचा (अर्थात सुमन कल्याणपूर यांचा) सोनेरी सहवास लाभला आणि मी मोहरुन गेलो. जो स्वर्गीय स्वर ऐकत मी लहानाचा मोठा झालो, त्या स्वराच्या सोबतीने मी एक दिवस डायस शेअर करणार आहे, हे मला या आधी कुणी सांगितलं असतं तर मी त्याला वेड्यात काढलं असतं. पण तो योग असा अवचित माझ्या आयुष्यात आला. नुसता डायस शेअर नव्हे तर या निमित्ताने मी चांगला महीनाभर सुमनताईंच्या संपर्कात होतो. त्यांच्या घरी येत जात होतो. त्यांच साधेपण, त्यांची नजाकत, त्यांच हळवेपण अनुभवत होतो आणि श्रीमंत होत होतो. त्यांच्या स्वरांनी माझं किशोरवयही कसं मंतरून टाकलंय हे मी त्यांना सांगीतलं, तेव्हा त्या किती सुंदर लाजल्या म्हणून सांगू.....!

-प्रसाद कुलकर्णी

पनवेल कल्चरल सेंटरमध्ये आनंदयात्रा चा प्रयोग

2010-03-16T04:27:00.000-07:00

लोकसत्ता पनवेल -२ मार्च

आनंद ही मानवी ्जीवनातील सर्वात अमूल्य गोष्ट आहे. परमेश्वराने ती आपल्याला विनामूल्य दिलेली आहे. तरी अनेकांना त्याची जाणीव नसते. असे प्रतिपादन लोकप्रिय कवी श्री प्रसाद कुलकर्णी यांनी केले. सांस्कृतिक क्षेत्रात आघाडीवर असणार्या ’पनवेल कल्चरल सेंटर’ तर्फे होळीनिमित्त कुलकर्णी यांचा आनंदयात्रा हा एकपात्री कार्यक्रम आयोजीत करण्यात आला होता, त्यावेळी ते बोलत होते. विविध किस्से, कविता, अनुभव याद्वारे श्रोत्यांना तुफान हसवता हसवता त्यांनी मानवी नातेसंबंधाविषयी हृदयस्पर्शी विचार मांडून श्रोत्यांना अंतर्मुखही केले.

परमेश्वर दररोज आपल्याला २४ तासांचा चेक देतो. या धनादेशाच्या देणगीची बरयाच लोकांना कल्पना नसते. ज्या सुदैवी माणसांना याची जाणीव असते ते त्याचा पुरेपुर उपयोग करुन आपले आणि आपल्यासोबत इतरांचे जीवनही आनंददायी करुन टाकतात. त्यांच्या या निरिक्षणावर श्रोत्यांनी टाळ्यांचा कडकडाट केला. मराठी शुभेच्छापत्रांची मुहुर्तमेढ रोवणारया या कवीने आपले या क्षेत्रातले खुसखुशीत अनुभवही यावेळी कथन केले.

अडीच तासांहून अधिक वेळ रंगलेल्या या कार्यक्रमाला श्रोत्यांचा भरभरुन प्रतिसाद लाभला. संस्थेचे अध्यक्ष जगन्नाथ जोशी यांनी त्यांचे स्वागत केले. तर नंदकुमार गोगटे यांनी त्यांचा परिचय करुन दिला.

(लोकसत्ता मधून साभार. सविस्तर महितीकरता संदर्भ लोकसत्ता, गुरुवार ०३ मार्च २०१०)

महागायिका उर्मिला धनगरचा सत्कार प्रसाद कुलकर्णी यांच्या हस्ते

2010-02-12T15:43:00.000-08:00

झी टीव्ही वरील आयडिया सारेगमप ची विजेती उर्मिला धनगर हिचा सत्कार नुकताच अंबरनाथ येथे प्रसाद कुलकर्णी यांच्या हस्ते करण्यात आला. या सोहळ्याला विम्को चे जनरल मॅनेजर श्री राजीव सावंत आणि उर्मिलाचे गुरु श्री अच्युत जोशी हे उपस्थित होते.

या समारंभाची काही क्षणचित्रे.

पुणे विद्यापीठ एमबीए स्टुडन्ट्स (PUMBA) गॅदरिंग

2010-02-04T22:20:00.000-08:00

हा व्रुत्तांत आपण वाचायलाच हवा. खालील लिंकवर फक्त क्लिक करा-

http://bpositiveprasad.blogspot.com/

प्रसाद : नव्या वर्षाची सुरुवात

2010-01-22T23:40:00.000-08:00

्नवे वर्ष काय घेऊन येते आहे - ३१ जानेवारी - रत्नागिरी. सारस्वत मित्र या मासिकाच्या वर्धापन दिनानिमित्त प्रेरणादायी कार्यक्रम ’बी पॉझिटिव्ह’ १२ फेब - ’बी पॉझिटिव्ह’ थळ वायशेत १९ फेब - कॅमलिन लिमिटेड २० फेब - नागपूर (आनंदयात्रा) २६ फेब - नंदुरबार (बी पॉझिटिव्ह) २७ फेब - धुळे (आनंदयात्रा) १७ मार्च - बोरिवली (बी पॉझिटिव्ह) याव्यतिरिक्त - फ़ेब २०१० - नवा म्युझिक अल्बम श्रीधर फडकेंसोबत मार्च २०१० - नवा म्युझिक अल्बम अशोक पत्की आणि मंगेश बोरगावकरसोबत एप्रिल २०१० - ६ वा चित्रपट रिलिज होतोय - ’नातवंड’ एप्रिल २०१० - ७ वा चित्रपट रिलिज होतोय - ’मंगळसूत्र’ मे २०१० - थांबा आणि वाट पहा.....

श्रीधर फडके आणि प्रसाद एकत्र...

2009-12-13T03:56:00.000-08:00

श्रीधर फडकेंसोबत प्रसादने केलेल्या नव्या गाण्याची जन्मकथा त्याच्याच शब्दात - श्रीधर फडकेंसोबत एखादं गाणं करणं हा केवढा तरी सम्रुद्ध करणारा अनुभव असतो. वयाचं अंतर ओलांडूनही त्यांची माझी दोस्ती तशी दीड दशकाची म्हणायला हरकत नाही. पण आम्ही एकत्र गाणं करण्याचा योग कधी आला नव्हता. तो या गाण्यामुळे आला. श्रीधरजींना कुणीतरी पुण्याहून कवितेच्या दोन ओळी sms केल्या. त्यांना त्या एवढ्या आवडल्या की त्यांनी पुण्याला फोन करुन विचारलं, या ओळी कुणाच्या आहेत.... माझं नाव कळल्यावर त्यांनी मला फोन करुन सांगितलं, ’प्रसादराव, याचं आपण गाणं करायचं का? ’ मी म्हटलं, ’अरे व्वा!, करायचं का म्हणजे काय, माझ्याकरता ही अतिशय आनंदाची गोष्ट आहे. पण तुमच्याकडे माझ्या या दोन ओळी आल्यात ना त्या म्हणजे एका कवितेच्या एका कडव्याचा भाग आहेत. मी तुम्हाला अख्खी कविताच पाठवतो.’ श्रीधरजी म्हणाले, ’ह्या दोन ओळी मला फार आवडल्यायत. आपण या कडव्याचा मुखडा करायचा आणि बाकी सारं गाणं नव्याने लिहायचं’ आता आली पंचाईत. एवढी सुंदर कविता, तिची मोडतोड करायला माझं मन तयार होईना. शेवटी हो-ना करता करता मी तयार झालो. होळीनंतरचा दुसरा दिवस येतो, धुळवड... त्या दिवशी सारेजण रंग खेळत होते. मी आणि श्रीधरजी मात्र पार्ल्याच्या घरी सकाळपासून पेटी काढून बसलो होतो. श्रीधरजी एकेका शब्दाला, एकेका ओळीला तीन-चार प्रकारे चाल लावायचे आणि मला विचारायचे,’ही कशी वाटते सांगा?’ मग मला मी नव्याने बनवलेल्या या गाण्यातला एखादा शब्द बदलायला अगदी पोलाईटली सुचवायचे. मी ईरीटेट होत असे. पण शेवटी आमची तडजॊड होत असे. एवढे मोठे संगीतकार आणि वयाने मला जेष्ठ असूनही कधी ते नमतं घेत. कधी मी घेत असे. शहाण्या मुलासारखा त्यांना अडणारा शब्द बदलत असे. मार्च २००९ मध्ये सुरु झालेलं या गाण्याच्या निर्मितीचं आमचं काम स्वप्निल बांदोडकरच्या आवाजात रेकॉर्ड व्हायला डिसेंबर महीना उजाडला. या कालावधीत शब्द आणि सूर यांवर आम्ही दोघांनी एकूण ३३ तास मेहनत घेतली. एकेका शब्दासाठी, एकेका सूरासाठी झगडलो. मध्यंतरी काही कामासाठी यशवंत देवांना फोन केला होता. इकडच्या तिकडच्या गप्पा झाल्यावर देवसाहेब मला म्हणाले, ’सध्या नविन काय करताय?’ मी म्हटलं, ’काळाच्या पाटीवर शीलालेख कसा खोदला जातो, ते श्रीधर फडकेंकडून शिकतोय.’ असे सुंदर शब्द जमलेत, श्रीधरजींनी अशी सुंदर चाल लावली्य आणि स्वप्निल बांदोडकर अशा मेहनतीने गायलाय की हे गाणं हीट होणार हे मी खात्रीने सांगू शकतो. लवकरच ऐकू लागाल तुम्ही... या वस्तीवर या घटकेला सर्व ॠतुंचे सहर्ष स्वागत. रंग फुलांचे या रस्त्यावर मिरवत जाती वाजत गाजत.... आनंदाला बहर असा की इंद्र्धनुही उतरे खाली. अंधाराचा पडघम वाजे वारा वाहे गंधपखाली...

नवा कार्यक्रम - बी पॉझिटीव्ह

2009-12-05T05:35:00.000-08:00

पॉझिटिव्ह ऍटिट्यूड अर्थात सकारात्मक मनोव्रुत्ती या विषयावरील प्रसाद्च्या बी पॉझिटिव्ह या नव्या कार्य्क्रमाच्या माहितीकरता खालील ब्लॉग पहा: http://bpositiveprasad.blogspot.com/

तो आनंदयात्री

2009-11-09T05:32:00.000-08:00

त्याला शब्द वश आहेत. त्याने सहजपणे दोन ओळी लिहील्या तरी त्याची कविता होते. तो स्वत:ला आनंदयात्री समजतो. अनेक संकटं, दु:खं, शारिरीक दुखणी, अपघात,संघर्ष एवढं सगळं पचवूनसुद्धा त्याने मनाचा मोर सदैव थुईथुई नाचत ठेवला आहे. प्राणांच्या पुष्करणीवर आनंदाचे तुषार फ़ुलत ठेवले आहेत.

तो आयुष्यावर प्रेम करतो आणि म्हणूनच समोर येणार्या प्रत्येक प्रसंगावर, प्रत्येक अनुभवावर, प्रत्येक व्यक्तीवर तो प्रेम करतो. त्याच्याच शब्दात सांगायचं तर कर्ण जसा कवचकुंडल घेवून जन्माला आला. तसा तो कविता घेऊन जन्माला आला. आणि त्याच्या कवितेला प्रेमाचं परिमाण असल्यामुळे तो लिहितो ते लहानांपासून मोठ्यांपर्यत, तरुणांपासून व्रुद्धांपर्यत सर्वांनाच आवडतं. मराठी शुभेच्छापत्रांची संकल्पना त्यानेच रुजवली असून मधु मंगेश कर्णिकांनी त्याला शुभेच्छांचा सॊदागर ही उपाधी दिली आहे.

हो, त्याचं नाव आहे प्रसाद कुलकर्णी! वास्तविक त्याचा आतापर्यतचा सारा प्रवास अडचणींना तोंड देतच झालेला आहे. कोकणातल्या खेडेगावात जन्मलेला, वाढलेला आणि जात्याच बुध्दीमान असलेला हा मुलगा शालान्त परिक्षेत गुणवत्ता यादीत येणारा अशी सर्वांची अपेक्षा होती. पण कौटुंबिक आपत्तींमुळे घराचं घरपण विस्कळीत झालं आणि त्यात अभ्यासाचा सूर हरवला. अपेक्षेएवढे गुण मिळू शकले नाहीत. मग त्याने नोकरीसाठी सरळ मुंबईचा रस्ता धरला. मुंबईला आल्यावर माणसांच्या महासागरात त्याने आपली मूळची निसर्गसुंदर लोभसवाणी कविता जगवली... नुसती जगवली नाही, तर फ़ुलवली देखील! त्याच्यावर झालेल्या अन्यायाचं परिमार्जन करण्यासाठी म्हणून की काय, नियतीने अनेक सुवर्णयोगही त्याच्या ओंजळीत घातले. मधु मंगेश कर्णिक, माधव गड्करी, मंगेश पाडगावकर अशा दिग्गजांशी त्याचा हेवा वाटावा असा दोस्ताना जमला. त्याने लिहिलेलं पहिलं भावगीत रेडीयोकरता उषा मंगेशकरांनी गायलं! त्याची पहिली ध्वनीफ़ित स्वरबध्द केली पंडीत यशवंत देवांनी! त्याच्या पहिल्यावहिल्या चित्रपटगीताला आवाज लाभला हिंदी सुपरस्टार गायक शानचा! शुभेच्छापत्रांवरील काव्यमय संदेश लेखनाने त्याचं नाव घराघरात पोहोचवलं. मिलींद इंगळेच्या सांजगारवासाठी लिहिलेल्या कवितांनी त्यावर कळस चढवला. ४ कवितासंग्रह.... ५ ध्वनिफिती.... ६ चित्रपट.... ४५०० हून अधिक शुभेच्छापत्रं.... लोकप्रभा, सकाळ आणि लोकसत्तासारख्या लोकप्रिय दैनिकातले स्तंभलेखन.... जाहीरात क्षेत्रातल्या टॉपच्या जाहिरात एजन्सीज करता कॉपीरायटींग.... रेडीयो, टिव्हीवरचे अगणित कार्यक्रम.... एवढे बख्खळ ग्रहबळ पाठीशी असूनही त्याची खरी ओळख आहे आनंदयात्री हीच.

मी तिच्याशी अबोला धरतो तेव्हा...

2009-10-27T06:30:00.000-07:00

निळ्या निळ्या आभाळात एक मेघ झरत असेल

आता तिथे एक माणूस माझ्यासाठी झुरत असेल.

आता येईल फोन तिचा ’बोलत का नाहीस?

एसेमेसला माझ्या उत्तर पाठवत का नाहीस?

तुझं गाणं तुझे शब्द वेडं करतात मला!

झालं गेलं विसर आणि सोड ना अबोला!’

काळजाचा डोह माझ्या आठवणींनी भरत असेल

आता तिथे एक माणूस माझ्यासाठी झुरत असेल.

तिचं हसणं तिचं बोलणं आणि तिची बडबड

तिचं मौन सोसणं मला जातं खूप अवघड

मीही तिच्यात गुंतलो होतो आता कळ्तं मला

तिचं नसणं कण कण जाळत असतं मला

तिलासुध्दा तिथे आता हाच विचार स्मरत असेल

आता तिथे एक माणूस माझ्यासाठी झुरत असेल.

अन एकाएकी लागेल उचकी येईल तिचा फोन

मी सुध्दा हॅलो म्हणेन विसरून माझं मौन

तिचा स्वर कातर आणि शब्द ओथंबलेले

’का रे छळ्तोस असा माझे श्वास थांबलेले’

दोघांमधलं अंतर आता वारयासारखं सरत असेल

आता तिथे एक माणूस माझ्यासाठी झुरत असेल.

-प्रसाद कुलकर्णी

प्रसाद्चा सातवा चित्रपट

2009-09-04T00:28:00.000-07:00

’नातवंडे’ हा प्रसाद कुलकर्णी यांचा गीतकार म्हणून सातवा चित्रपट दिवाळीच्या सुमारास येऊ घातला आहे. दिलीप प्रधान हे या कौटुंबिक चित्रपटचे दिग्दर्शक असून प्रसादची यातली ३ गाणी साधना सरगम आणि रविन्द्र साठे हे गाणार आहेत. त्यापैकी पहिल्या गाण्याचे ध्वनिमुद्रण नुकतेच ’गॉडस गिफ्ट’ वर्सोवा येथे पार पडले.

My Beloved Husband Prasad

2009-03-01T22:00:00.000-08:00

This is about a story of poet named Prasad Kulkarni, My beloved husband, A most popular and a versatile poet in Marathi. He rules over the world of words. He is the pioneer of Marathi Greeting cards. Poet of Milind Ingle's popular album Saanj Garva. Writer of Prasadik, the popular column in लोकप्रभा. His poetic account is full of more than: -4500 Marathi greeting cards. -400 shows of his Anandyatra -100 TV and Radio appearances. -9 Marathi feature films. -13 Audio albums. -4 Poetry collections. -4 Popular columns in Marathi magazines. -2 TV serials and the list is going on........ One unique thing about him is his positive attitude. He loves life... it's every moment...every happening...every person..! And thats how he lives a graceful life inspite of a lot of odds and difficulties.

देव प्रसन्न झाला की

2009-02-26T07:33:00.000-08:00

देव प्रसन्न झाला की

पहात नाही पात्र अपात्र

मग मझ्यासारख्याच्या ओंजळीत

टाकतो तुझ्यासारखं नक्षत्र

कवी: प्रसाद कुलकर्णी

प्रेस रिव्यू

2008-07-28T09:05:00.000-07:00

प्रसादच्या कविता

2008-06-09T05:21:00.000-07:00

१.प्रेम कहाणी

झोपाळ्यावर वेडी राधा तल्लीन होऊन झुलते रे

मोरपिसांची प्रेम कहाणी मनात माझ्या फुलते रे।

तुझ्या प्रीतीची रीत वेगळी

कधी कुणाला नाही कळली

नक्शत्रांच्या लक्श दिव्यांना प्रीत तुझी पण कळते रे।

नजर बोलते शब्दांवाचून

उरात माझ्या होते स्पंदन

तुझ्याचसाथी विरहव्यथेने व्याकुळ होऊन झुरते रे।

झाडामागे चंद्र थरथरे

रूश्ट भासती उल्का तारे

तुझी नि माझी प्रेम कहाणी त्या सार्यांना सलते रे।

थांब जरासा इथे एक शण

रूडी रितींचे फसवे कुंपण

ह्या सार्यांचे बंधन तोडून तुझ्यासवे मी येते रे

मोरपिसांची प्रेम कहाणी मनात माझ्या फुलते रे।

२ प्रेम म्हणजे काय रे

प्रेम म्हणजे काय रे, दुधावरची साय रे

आपुलकीची ऊब मिळ्ता सहज उतू जाय रे।

प्रेम म्हणजे गात रहाणं आनंदाचं गोड गाणं

प्रेम म्हणजे पौर्णिमेच्या चांदण्यामध्ये बेभान हॊण

प्रेम म्हणजे झुळझुळ झरा प्रेम म्हणजे अवखळ वारा

प्रेम म्हणजे सोनपिवळ्या उन्हामधल्या श्रावण धारा

प्रेम म्हणजे हळवं गीत प्रेम म्हणजे व्याकुळ प्रीत

प्रेम म्हणजे कुर्बानीची जगावेगळी न्यारी रीत

प्रेम म्हणजे असून नसणं प्रेम म्हणजे नसून असणं

प्रेम म्हणजे स्वतापासून स्वतालाच हरवून बसणं

प्रेम म्हणजे काय रे, दुधावरची साय रे

आपुलकीची ऊब मिळता सहज उतू जाय रे.

३. इथे फुलांचा उत्सव चालू

इथे फुलांचा उत्सव चालू तुझ्या कळ्यांना दे आमंत्रण

सांग तयांना देह आज मी या गंधाला दिलाय आन्दन

या वस्तीवर या घटकेला

सर्व रुतूंचे सहर्श स्वागत

रंग फुलांचे या रस्त्यावर

मिरवत जाती वाजत गाजत

संकेतांचे बंध तोडुनी कर रंगाचे सचैल शिंपण

आनंदाला बहर असा की

इंद्रधनूही उतरे खाली

अंधाराचा पडघम वाजे

वारा वाहे गंध पखाली

काळोखाच्या दरवाजावर नक्शत्रांचे सुंदर तोरण

इथे मनाचे मोर नाचती

फुलवुन अपुले स्वप्न पिसारे

असा घडे आनंदसोहळा

बेहोशीने गाती तारे

श्वासांसंगे श्वासांगणती आनंदाची करुन उधळण

काही छोट्या कविता

१. तू आहेस म्हणून माझ्या

आयुश्याला अर्थ आहे

तुझ्याविना माझ्या जिवा

उभा जन्म व्यर्थ आहे

मेघावाचून नभामधनं

पाणी कधी झरेल काय

तुला वजा केल्यावरती

मागे काही उरेल काय

२. डोळ्यामध्ये वादळ आणि

उरावरती घाव आहे

त्याच्या आड डबडबलेला

वेदनांचा गाव आहे

तिथले लाल गुलाब पाहून

माणसं फसतात चटदिशी

तिथे माझी स्वप्न गेलीत

माझ्या डोळ्यादेखत फाशी

३ डोळ्यांनी का होईना पण

आत्ताच बोलून घे गडे

तुला शब्द सुचतिल तेव्हा

कुठे असेल कुनास ठाऊक

तुला सूर सापडेल असे

काहीतरी आत्ताच कर

उद्या तुझ्या मैफलीत

असेन नसेन कुणास ठाऊक