जळगावमध्ये आनंदयात्रेला तुडुंब प्रतिसाद

लोकमत सखी मंच ने  मागील महिन्यात  जळगाव येथे आयोजीत केलेल्या आनंदयात्रेचा हा चित्रमय  व्रुत्तांत. 

या कार्यक्रमाला एवढी गर्दी लोटली होती की १००० क्षमतेचा हॉल पूर्ण भरुन शेकडो रसिक मागे उभे होते.
धन्यवाद, लोकमत जळगाव.

सह्याद्री वाहिनीवर थेट मुलाखत

प्रसाद कुलकर्णी यांची थेट मुलाखत मंगळवार, दिनांक २४ सप्टेंबर रोजी सह्याद्री वाहिनीवर दुपारी १.३० वाजता पहायला विसरु नका. आपण थेट  (LIVE) प्रश्नही विचारु शकता.

उदय निर्गुडकर प्रासादिक वर बोलताना....

http://youtu.be/1uDg7wcgPmw

अशीच यावी वेळ एकदा.... (अल्बम-सांजगारवा, कवी-प्रसाद कुलकर्णी)

अशीच यावी वेळ एकदा स्वप्नी देखील नसताना ,
असे घडावे अवचित काही, तुझ्या समिप मी असताना

उशीर व्हावा आणि मिळावी एकांताची वेळ अचानक ,
जवळ नसावे चिट्ट्पाखरू केवळ तुझी नि माझी जवळिक

मी लज्जित, अवगुंठित आणि संकोचाचा अंमल मनावर ,
विश्वामधले मार्दव सारे दाटून यावे तुझ्या मुखावर

मनात माझ्या 'तू बोलावे' तुझ्या मनीही तीच भावना ,
तूच पुसावे कुशल शेवटी, करून कसला वृथा बहाणा

संकोचाचे रेशीमपडदे हां हां म्हणता विरून जावे ,
समय सरावा मंदगतीने अन प्रीतीचे सूर जुळावे

तू मागावे माझ्यापाशी असे काहीसे निघताना ,
उगीच करावे नको नको मी हवेहवेसे असताना

हुशार तू पण, तुला कळावा अर्थ त्यातुनी लपलेला ,
आपुलकीच्या दिठीत भिजवुन मिठीत घ्यावे तू मजला

सचैल न्हावे चिंब भिजावे तुझ्या प्रितीच्या जलामध्ये ,
युगायुगांची आग विझावी त्या बेसावध क्षणांमध्ये

शब्दांवाचुन तुला कळावे गूज मनी या लपलेले ,
मुक्तपणे मी उधळून द्यावे जन्मभरी जे जपलेले
 - प्रसाद कुलकर्णी

आनंदयात्रा ५०० व्या प्रयोगाची क्षणचित्रे



हाउसफुल्ल गर्दी आणि मान्यवरांची मांदियाळी

 

‘प्रासादिक’ या आनंदी आयुष्याचे रहस्य उलगडणाऱ्या पुस्तकाचे प्रकाशन

सुभाष देसाई आणि उदय निरगुडकर यांच्या हस्ते सत्कार

आनंदयात्राच्या ५०० व्या सोहळ्याचे सादर निमंत्रण

प्रसाद कुलकर्णी यांच्या ‘आनंदयात्रा’ या सदाबहार कार्यक्रमाचा ५०० वा प्रयोग शुक्रवार १५ फेब्रुवारी रोजी संध्याकाळी ७ वाजता पु ल देशपांडे मिनी थिएटर, प्रभादेवी येथे साजरा होतो आहे.

ज्येष्ठ शिवसेना नेते श्री. सुभाष देसाई आणि झी २४ तास वाहिनी चे मुख्य संपादक श्री. उदय निर्गुडकर हे या सोहळ्याला प्रमुख पाहुणे म्हणून उपस्थित रहाणार आहेत.

याच प्रसंगी, ‘प्रासादिक’ हे त्यांचे आनंदी आयुष्यावरचे पुस्तक या समारंभात प्रकाशित होत आहे. राजेन्द्र प्रकाशन या नामवंत संस्थेद्वारे त्याची निर्मिती झालेली आहे.

कार्यक्रम सर्व रसिकांकरता खुला आहे. तरीही माझ्या भ्रमणध्वनीवर किंवा ईमेल ने आपले येणे मला कळवू शकलात तर आपल्यासाठी जागा राखून ठेवणे सोपे जाईल.

या व्यक्तिगत निमंत्रणाचा स्वीकार करुन त्या दिवशी अगत्याने येण्याचे करावे ही विनंती.

-नम्रता

9757200499

 

मी तुला शोधण्यासाठी मौनात उतरलो तेव्हा...

मी तुला शोधण्यासाठी मौनात उतरलो तेव्हा

चूपचाप फसवूनी मजला हलकेच जखडला त्यांनी

तू गवसलीस ही नाही, मी नजरबंदही झालो

शब्दांच्या तीरकमठ्यांनी मज वीदीर्ण केला त्यांनी

-प्रसाद कुलकर्णी

आनंदयात्राचे आगामी कार्यक्रम

२२ डिसेंबर - वाल्मी(GPR 1983 कुटुंब संमेलन)

२३ डिसेंबर - औरंगाबाद

२४ डिसेंबर सकाळी-  शिवाजी महाविद्यालय चिखली (बुलडाणा)

२४ डिसेंबर संध्याकाळी- खामगाव तालुका पोलीस कुटुंब संमेलन

२९ डिसेंबर - काकडे कॉलेज, सोमेश्वर नगर (बारामती)

३० डिसेंबर - अत्रे कट्टा गोरेगाव ( कविसंमेलन)

६ जानेवारी – अत्रे कट्टा गोरेगाव (पुस्तक प्रकाशन)

१२ जानेवारी – बदलापुर

२ फेब्रुवारी – सोलापूर

१५ फेब्रुवारी – रविंद्र नाट्यमंदीर, प्रभादेवी

आनंदयात्रा या सदाबहार कार्यक्रमाचा ४८६ वा प्रयोग

आनंदयात्रा या सदाबहार कार्यक्रमाचा ४८६ वा प्रयोग शनिवार दिनांक ०६ ऑक्टोबर २०१२ रोजी एन्जेपी हॉल, गोरेगाव येथे आयोजीत करण्यात आला आहे. सर्वांना सादर निमंत्रण….!

श्रावण झरतो आभाळातून

श्रावण झरतो आभाळातून
व्रुंदावन त्यालाच विचारी.
भिजला चाफा, चिंब सायली
विरक्त का रे तुळस बिचारी.....?
-प्रसाद कुलकर्णी

आनंदयात्रेच्या विदर्भ दौऱ्याचे प्रेस रिपोर्टस

लोकमतची जाहिरात

मुक्काम पोस्ट अकोला, दिनांक २९ जून २०१२

मुक्काम पोस्ट बुलडाणा, दिनांक ३० जून २०१२

मुक्काम पोस्ट खामगाव, दिनांक ०१ जुलै २०१२

शान मराठीत पहिल्यांदा गायला माझ्याकरता!

जुईली या माझ्या पहिल्या मराठी चित्रपटासाठी शान गायला,
त्या रेकॉर्डींगचा हा संस्मरणीय फोटो.
तारीख होती २२ जुलै २००२.
शानचंही हे पहिलंच मराठी गाणं होतं असं स्वत: शान म्हणाला.

शान मराठीत आपल्यासाठी पहिल्यांदा गायल्याचा दावा अनेकजण करतात,
खास त्यांच्याकरता ही माझ्या संग्रहातली आठवण.
गाण्याचे बोल होते-

'मी तोच तोच, तू तिच तिच पण स्पर्श भासतो नवा नवा
हे गीत तेच ही प्रीत तिच पण हर्ष वाटतो नवा नवा!'

या गाण्याच्या शूटींगचा हॅडिकॅम व्हिडियोही माझ्याकडे उपल्ब्ध आहे.

ती मौनाने बोलत जाते

ती मौनाने बोलत जाते
मी प्राणांनी ऐकत जातो
ती गालावर गोंदत जाते
मी ओठांनी वाचत जातो!

ती सुंदर ती लोभसवाणी
आनंदाची गाते गाणी
ती नाजुकसे फूल जुईचे
तिच्या मनाला पंख सायीचे
ती श्वासांवर तोलत जाते
मी श्वासांनी झेलत जातो
ती गालावर गोंदत जाते
मी ओठांनी वाचत जातो!


ती चाफ्यापरी मुसमुसलेली
ती केतकीपरी रसरसलेली
ती दरवळते जुई जाईतुन
ती रिमझिमते श्रावण होऊन
ती टपटपते प्राजक्तातुन
मी नजरेने वेचत जातो
ती गालावर गोंदत जाते
मी ओठांनी वाचत जातो!

-प्रसाद कुलकर्णी

.

'मन मोहरले' ध्वनिमुद्रिकेचे प्रकाशन

‎'मन मोहरले' हा माझा १६ वा म्युझिक अल्बम (आणि पहिला सोलो) मंगळवार दिनांक २२/११/ २०११ या दिवशी संगीतकार राहुल रानडे, सिनेदिग्दर्शक राजू पार्सेकर आणि आमदार अशोकभाऊ जाधव यांच्या उपस्थितीत प्रकाशित झाला.
जेष्ठ संगीतकार सय्यद अली यांनी माझ्या शब्दांना स्वरसाज चढवला असून इंडियन आयडॉल अभिजीत सावंत, अभिलाषा चेल्लम आणि मंगेश बोरगावकर यांचा आवाज या गाण्यांना लाभला आहे. सिद्धेश सावंत आणि महेश खोपडे या दोन रसिक तरुणांच्या प्रयत्नातून ही सीडी साकार झाली आहे.

आणि एच.एम.व्ही. सारेगामा इंडिया प्रा.लि या नामांकीत संस्थेने या सीडीची निर्मिती केली आहे.

-प्रसाद कुलकर्णी

म्हाताऱ्या आईची गोष्ट

मुंबई सकाळ मध्ये या वर्षीच्या १ जानेवारीपासून दर सोमवारी माझं 'गुड मॉर्निंग' हे सदर सुरु आहे.

सकाळ हे माझं होम पीच!. आणि त्यामुळे संपादकीय विभागातले माझे मित्र नेहमीच माझ्याकडून चांगलं चांगलं लिहून घेतात.

हे सदर खूप लोकप्रिय झालय आणि मला मेल्स वा फोनद्वारे त्याचा सतत फीडबॅक मिळत असतो.

क्रुतार्थ वाटावी अशी गोष्ट म्हणजे अलीकडेच मंगेश पाडगावकरांनी मला प्रत्यक्ष भेटीत सांगितलं की तुमचं सदर खूप चांगलं असतं आणि मी ते नियमित वाचतो. तुम्ही खूप छान लिहिता. यावर सुखद धक्का म्हणून की काय त्याच्या दुसऱ्याच दिवशी मला ज्यॆष्ठ पत्रकार कुमार केतकरांची मेल आली आणि त्यातही त्यांनी माझ्या लिखाणाचं मनापासून कौतुक केलं होतं. केतकरांसारख्या पत्रकारीतेतल्या भिष्माचार्यांनी स्व:ताहून अशी दाद देणं ही माझ्याकरता भारावून टाकणारी गोष्ट होती. त्यावर कडी म्हणून की काय, दोन दिवसांनी एका समारंभात ज्येष्ठ लेखक मधु मंगेश कर्णिक भेटले. त्यांनीही माझी पाठ थोपटत हीच भावना व्यक्त केली.

आता हे सारं मला माझ्या ब्लॉगवरल्या मित्रांशी शेअर करावसं वाटलं. विशेष करुन या सदरात मागील आठवड्यात मी लिहिलेली 'म्हाताऱ्या आईची गोष्ट'. या एका गोष्टीनेच मला खूप मोठ्ठं फॅन फॉलोईंग मिळवून दिलं. आणि माझ्या या भावना मी सकाळचे संपादक पद्मभूषण देशपांडे यांच्याशीही शेअर केल्या.

खरं खणजे ही गोष्ट नसून एक मुक्त कविता आहे. आणि ती वाचून तुमचा तुमच्या आईवडीलांकडे पहाण्याचा द्रुष्टीकोन बदलला तर ती मी माझ्या कवितेची परतफेड समजतो. क्रुपया तुमच्या भावना आणि प्रतिक्रिया मला माझ्या मेलवर कळवायला विसरु नका.

-प्रसाद कुलकर्णी

kulpras@yahoo.co.in - on behalf of Namrata

आनंदयात्रा ४२५ व्या प्रयोगाची क्षणचित्रे

आनंदयात्राचा एक विशेष प्रयोग गुरुवार दिनांक २१ एप्रिल रोजी माटुंगा येथील यशवंत नाट्यमंदिरात संपन्न झाला. या सोहळ्याला आदरणीय पंडीत यशवंत देव, छायाचित्रकार गौतम राजाध्यक्ष, ज्येष्ठ अभिनेत्री आशालता वाबगावकर, ज्येष्ठ गोदी कामगार नेते आणि माजी महापौर शांती पटेल आणि मी मराठी वाहिनीचे पराग छापेकर उपस्थित होते. या शानदार सोहळ्याची ही क्षणचित्रे.

सर्व ज्येष्ठ आणि श्रेष्ठ मंडळींच्या हस्ते प्रसाद्चा सत्कार

आईच्या भूमिकेतून आशालताबाई आशीर्वाद देताना

देवांचा मूड असा मस्त लागला आणि गौतमजींची दिलखुलास दाद

देवांचा ही सत्कार

आणि हे "मेनी मूड्स"

रंगून गेलेले श्रोते आणि कार्यक्रमाच्या शेवटी प्रसाद सुखटणकर या वेड्या मित्राने भारावून जाऊन मारलेली मिठी आणि भारावून बघणारी त्याची आई -(नम्रता १४०५२०११)

सर्वांना अत्याग्रहाचे निमंत्रण

प्रसादच्या आनंदयात्रा चा ४२५ वा प्रयोग गुरुवार दिनांक २१ एप्रिल रोजी संध्याकाळी ४.३० वाजता यशवंत नाट्यमंदिर, माटुंगा येथे आयोजीत करण्यात आलेला आहे. गेल्या काही वर्षात हा कार्यक्रम भन्नाट लोकप्रिय झाला असून अनेक नामवंतांनी, नेते, अभिनेते, पत्रकार, लेखक इथपासून गावागावातील सामान्य शेतकरी, मजूर, कामगार अशा सर्व थरातल्या लोकांनी या कार्यक्रमाला हजेरी लावलेली आहे. या ४२५ व्या कार्यक्रमाला ज्येष्ठ कामगार नेते श्री. शांती पटेल, संगीतकार पंडीत यशवंत देव, जागतिक किर्तीचे छायाचित्रकार गौतम राजाध्यक्ष, मुंबई महानगरपालिका सभाग्रुह नेते सुनिल प्रभू आणि मी मराठी वाहिनीचे पराग छापेकर हे प्रमुख पाहुणे म्हणून उपस्थित रहाणार आहेत. हा कार्यक्रम सर्वांसाठी खुला असून विनामूल्य प्रवेशिका कार्यक्रमाच्या दिवशी हॉलवर उपलब्ध आहेत. आगाऊ नोंदणीसाठी श्री अशोक वायकूळ यांच्याशी ९८६९३३७३०३ किंवा ९९६९०७७१३३ या नंबर वर संपर्क साधावा. सर्वांना अत्याग्रहाचे निमंत्रण! -नम्रता

आनंदयात्राचा अविस्मरणीय प्रयोग- मुक्काम अकोला

हिंदी पेपर्सनी सुद्धा घेतली दखल..................नजर लागावी अशी गर्दी ही शुभेच्छांची एक्स्प्रेस........................................................आणि मंत्रमुग्ध श्रोते

्कवितांची रिमझिम आणि .......................................................रसिकांचा प्रतिसाद

आणि असा लागलेला सूर.... ४ जानेवारी २०११ रोजी प्रसादच्या आनंदयात्रा या महाराष्ट्रात आणि महाराष्ट्राबाहेरही लोकप्रिय ठरलेल्या एकपात्री कार्यक्रमाचा ४०० वा प्रयोग अकोला इथे आयोजीत करण्यात आला होता. ४ जानेवारी हा त्याचा वाढदिवस असूनही क्षितिज-विरंगुळा या अंध-अपंग-मतिमंद मुलांच्या संस्थेकरता निधी गोळा करुन देण्याच्या उद्देशाने त्याने हा कार्यक्रम विनामूल्य करायचं ठरवलं होतं.

३ जानेवारी रोजी मुंबईहून अकोल्याला घेऊन जाणारी हावडा मेल ८ तास लेट म्हणजे रात्री ८.३० ऐवजी दुसऱ्या दिवशी पहाटे ४.३० वाजता सुटली. ती सारी रात्र दादर रेल्वे स्टेशनवर कडाक्याच्या थंडीत घालवावी लागली. तिकीट चेकींग, बर्थ लावणे हे सारे सोपस्कार पूर्ण होईपर्यंत सकाळचे ६ वाजले होते. आता अंथरुणावर पडणार एवढ्यात वाढदिवसाच्या शुभेच्छा देणारा सेल वाजला. आणि त्यानंतर शुभेच्छांच्या फोन आणि एसेमेस ची रांगच लागली. एकदा त्याला वाटलं फोन बंद करुन टाकावा आणि झोपून जावं. मग त्याने विचार केला आपले मित्र, चाहते आपल्यावरच्या प्रेमापोटी आपल्याला फोन करतायत आणि आपण फोन बंद करायचा हे मुळीच बरोबर नाही. (दुसऱ्यांचा भावनांची आजवर तो नेहमीच कदर करत आलाय) आणि मग शुभेच्छांची ही आनंदयात्रा पुढचे बारा तास अकोला येईपर्यंत अशीच चालू राहिली. आदल्या २ रात्री रेकॉर्डींगकरता जागवलेल्या, ४ जानेवारीची रात्र दादर स्टेशनवर कडाक्याच्या थंडीत, अन १२ तासांचा मुंबई ते अकोला हा शुभेच्छांना प्रतिसाद देत केलेला प्रवास..... ४०० व्या कार्यक्रमाचे बारा वाजणार हे निश्चित झालं होतं. कारण दूरध्वनीवरून आधीच मिळालेल्या माहितीवरुन तिकीटं सारी विकली गेली होती, आणि प्रमिलाताई ओक सभाग्रुह आधीच हाऊसफुल्ल झालं होत.

पण संध्याकाळी ७ वाजता तो बोलायला उभा राहीला आणि पहिल्या पाच मिनिटांतच त्याने प्रेक्षकांना आपलसं केलं. पुढचे दोन तास सभाग्रुहात अखंड टाळ्या आणि हशा बरसत होता. दोन तासांनंतर तो अक्षरश: थकला तेव्हा त्याने कार्यक्रम नाईलाजाने थांबवला. अन्यथा रसिकाम्ची रात्री ११ वाजेपर्यंत थांबायचीही तयारी होती. या पोस्टवरती या कार्यक्रमाची काही छायाचित्रं आणि प्रेस रिपोर्टस टाकलेयत ते हा व्रुत्तांत अधोरेखीत करायला पुरेसे आहेत.

आणि हा कार्यक्रम सुरेख्ररित्या आयोजीत करण्याचं श्रेय जातं अकोल्याच्या सौ.मंजुश्री आणि उदय कुलकर्णी या दाम्पत्याला आणि त्यांच्या क्षितिज विरंगुळाच्या सर्व सहकाऱ्यांना..... आज या कार्यक्रमाला बरोब्बर १५ दिवस झाले तरी अकोल्याच्या रसिक प्रेक्षकाम्चे फोन्स किंवा मेल्स येतायत.

-नम्रता २१/०१/२०११

आनंदयात्राचे विनामूल्य प्रयोग, नाबाद ४०० च्या निमित्ताने

'आनंदयात्रा' या माझ्या धमाल एकपात्री कार्यक्रमाचा ४०० वा प्रयोग ४ जानेवारी रोजी अकोला इथे क्षितिज विरंगुळा या अंध अपंग पुनर्वसन केंद्राच्या मदतीसाठी आयोजीत करण्यात आला आहे. गेल्या ५-६ वर्षांत या कार्यक्रमाने ह्जारो श्रोत्यांना आनंद दिला. अन मला श्रोत्यांचे प्रेम आणि कौतुक! सामान्य श्रोत्यांपासून सर्वश्री मधु मंगेश कर्णिक, मंगेश पाडगावकर, कुमार केतकर, स्टार टीव्हीचे राजीव खांडेकर, यशवंत देव, श्रीधर फडके, शिवसेना नेते सुभाष देसाई,नटवर्य श्रीकांत मोघे, मोहनदास सुखटणकर, संगीतकार मिलींद इंगळे, अवधुत गुप्ते, कौशल इनामदार अशा असंख्य सेलिब्रेटीजचे प्रेमही मला लाभले. (ही काही नावे वानगीदाखल. प्रत्यक्षात ही यादी खूप् मोठी आहे). केवळ महाराष्ट्रच नव्हे तर इंदौर, राजस्थान, बेंगलोर, दिल्ली, हैद्राबाद अशा परप्रांतातही आणि दुबई अबुधाबीसारख्या परदेशातही माझी ही आनंदयात्रा पोहोचली आणि श्रोत्यांना आनंद देऊन, मराठीची ओढ लाऊन आली. मराठीत शुभेच्छापत्रांची मुहुर्तमेढ रोवण्याचे उत्तरदायित्व परमेश्वराने माझ्यावर सोपवले आणि ते मी निभावले म्हणून की काय आनंदयात्रेच्या रुपाने लोकांना आनंद वाटण्याचे आनंददायी कामही पुन्हा त्याने मला दिले. नाबाद ४०० चा हा ट्प्पा आज गाठत असताना आयुष्याचे सार्थक झाल्यासारखे वाटते. आणि माझ्या या आनंदात सर्वांनाच सहभागी करुन घ्यावेसे वाटते. समाजाने मला दिलेल्या अलोट प्रेमाविषयी क्रुतद्न्यता म्हणून पुढचे ४ आठवडे गरजू संस्थांसाठी विनामूल्य प्रयोग करण्याचे मी ठरवले आहे. (अर्थात काही अटींवर).. -प्रसाद कुलकर्णी kulpras@yahoo.co.in

पहिला इंडियन आयडॉल, अभिजीत सावंत गातोय माझी गाणी

नमस्कार.

्पहिला इंडियन आयडॉल, अभिजीत सावंतने आमच्या आगामी अल्बमकरता माझं गाणं गाण्याचा योग नुकताच आला. गॊड मुलगा आणि खूप मेहनती सुद्धा.

मी त्याचं वर्णन एका ओळीत करेन... milky boy with a silky voice. चार तास आम्ही न कंटाळता एका गाण्याचं रेकॉर्डींग करत होतो. आणि आम्हाला ’मॅनेज’ करत होते आमचे संगीतकार, श्री. सैयद अली.

आमचा हा म्युझिक अल्बम सुपरहीट होणार असा आम्हाला तिघांनाही विश्वास आहे. फक्त आणखी तीन महीने वाट पहा.

त्यात एकूण आठ गाणी असतील.

या टायटल सॉंगचे बोल आहेत -

लपवूनही लपवेना, अन धीरही धरवेना

हीच खरी प्रेमाची रीत असावी का?

प्रीत जिला म्हणती ती हीच असावी का?

-प्रसाद कुलकर्णी